నేను ముళ్ళపూడి వెంకట రమణ గారి అభిమానిని. ఎంత అభిమానినో చాలా, బాగా, గొప్ప అని విశేషణలు చేర్చలేనంత. అభిమానం అనుభవించడంలోనే తెలుస్తుంది మనమెంత అభిమానో.
చదువుకునే రోజుల్లో వారి రచనలు చదివి వాటిల్లోని కొన్ని పదాలను పదేపదే వల్లించుకుంటూ ఉండేవాళ్ళం. విజయా వారి సినిమాల తర్వాత ప్రజల చేత విశేషంగా సంభాషణలను వల్లె వేయించిన సినిమా ముత్యాలముగ్గు. ఆ ఘనతంతా ముళ్ళపూడి గారికే. ఇప్పటికీ ఆ తరం వాళ్ళ నాలుక చివర్న అవి ఉన్నాయి.
ఇహ బుడుగు విషయానికొస్తే అదో సంచలనం. పుస్తకాన్నెక్కిన ముళ్ళపూడి బాల్యం. అమూల్యం. ఆయన ఇరవై ఏళ్ళ వయసప్పుడే బురుగుని కన్నాడు. ఆ బుడుగుకు దృశ్యరూపం ఇచ్చింది బాపూ. అల్లరికో తెలివితేటలకో మాటకారితనానికో ఓ బ్రాండు అంబాసిడర్ . ప్రతి తల్లిదండ్రీ వాళ్ళ అబ్బాయిని బుడుగుగా చెప్పుకోడం ఒక క్రెడిబిలిటీ, అసలు వాళ్ళ పిల్లడిలో అంత విషయం ఉన్నా లేకున్నా. ముళ్ళపూడి వారి "బుడుగు" సీరియల్ గానూ, పుస్తకంగానూ ఎన్నో ఇళ్ళు చుట్టేశాడు. కొన్నిళ్ళు మళ్ళీ మళ్ళీ నూ. అట్లాంటి బుడుగు నన్నూ బాగా ఆకర్షించాడు. అదే కాదు కొన్ని సందర్భాల్లో బుడుగు భాషే మాట్లాడించాడు. దాని వల్ల నాకేదో ఐక్యూ బాగావుంది అనుకునే అపార్ధాన్ని మూటకట్టించాడు.
బురుగు సీ గానపెసూనాంబని బాగా ఇప్టపడతాడు. బురుగేంటీ ప్రతి తల్లి ఇష్టపడే రూపం గుణం పెసూనాంబకి ఇచ్చారు బాపూ రమణలు. బుడుగు కథలో గానపెసూనాంబ ఓ పిల్లతెమ్మెరలా మాత్రమే వస్తుంది. కానీ మనసు దోచేస్తుంది. అలాగే నా మనసూ దోచేసింది. ఆ ఇష్టమే బురుగు కథలో గానపెసూనాంబకి దొరకాల్సినంత చోటు దొరకలేదన్పించింది. నాకు తనే ఆ గోడు చెప్పుకున్నంతగా ఆలోచనలకు బందీ అయ్యాను.
ఆ మథనమే దాని ఫలితమే ఈ సీ గానపెసూనాంబ రాతలు. ఇవి ముళ్ళపూడివారి బుడుగు సౌరభాన్ని మరోసారి గుర్తుచేసుకునేందుకే తప్ప మరే ఫలమూ ఆశించి కాదు.
నాది ధిక్కారం కాదు, అహంకారం అంతకన్నా కాదు. బుడుగు భాషంటే మమకారం అంతే. ఇంకేం కాదు.
ఇది పొగరో తప్పో తెలియదు ముళ్ళపూడి వారి పాత్రకు నేను సొబగులు అద్దాలనుకోడం. ఇందులో నా గొప్పేం లేదు. పాత్ర వారిదే, భాష వారిదే, సందర్భాలూ అప్పటివే. పయనమొక్కటే నా ఊహ, భావుకతా.
నా ప్రయత్నం పలువురిని అలరించడం నే చెసిన సాహసాన్ని సమర్ధించుకునేందుకు ఉపయోగం.
ముళ్ళపూడి వారి మీద ఉన్న అఖండ అభిమానంతో వారి తొంభైయ్యవ జన్మదిన సందర్భంగా ఆయనను తలుచుకుంటూ నా సీ గానపెసూనాంబను 15 కథనాలను కానుకగా వారికి సమర్పించుకుంటున్నాను.
ఈ ఏకలవ్య శిష్యుడికి ఆయన వేసే ఏ శిక్ష అయినా సమ్మతమే.
( రా. శా. )
ఇంకో వెంకట్రమణ
Comments
Post a Comment