తన శాంతమె తనకు శిక్ష!
పదేళ్ళ క్రితం:
"ప్రభా, ఇద్దరం ఉద్యోగాలు చేసుకుంటున్నాం, సరిపడ డబ్బులున్నాయ్ ! మీ అమ్మగార్ని వచ్చి మనతో ఉండమనచ్చు కదా! అక్కడ ఒక్కరెందుకూ" భార్య యమున తన మనసులో మాట అన్నది భర్త ప్రభాకర్ తో.
వెంటనే అమ్మకి ఫోన్ చేసి అడిగాడు ప్రభాకర్ .
"మొన్ననే కదరా మీ పెళ్ళయింది. కొత్త కాపురంలో నేనెందుకురా పానకంలో పుడకలా" త్రోసి పుచ్చింది తల్లి.
******
తొమ్మిదేళ్ళ క్రితం:
" ప్రభా, మనం ఈ బెడ్ రూమ్ మీ అమ్మ గారికే ఉంచుదాం. మిగిలిన దాన్లోనే మనం సర్దుకుందాం. అత్తయ్య గారికి చెప్పండి వచ్చేయమని మన దగ్గరకి" యమున తన ఆలోచన పంచుకుంది భర్తతో.
" అదే చెప్పాను అమ్మతో. తొందరే ముందిరా? వస్తాన్లే అంటోంది" ప్రభాకర్ వివరణ భార్యకి.
******
ఎనిమిదేళ్ళ క్రితం:
"ప్రభా మన చంటి దానికి సంబంధించిన వన్నీ మీ అమ్మగారి కోసం ఉంచిన గదిలో పెడుతున్నాను. ఆమె వచ్చినప్పుడు ఖాళీ చెస్తాను. మళ్ళీ అడగ రాదూ వస్తారేమో!" యమున.
" అడిగాను. మొన్ననే పాప పుట్టింది కదరా, ఖర్చులు పెరుగుతుంటయ్ మీకు. మళ్ళీ ఆలోచిద్దాంలే అక్కడకి రావడం గురించి అంది అమ్మ" ప్రభాకర్ తెలిపాడు.
******
ఏడేళ్ళ క్రితం:
"పాపకి పెద్ద తోడు ఉంటుంది, వాళ్ళిద్దరూ ఒక మంచం మీద పడుకుంటారు. అత్తయ్యగారు వచ్చేసే విషయం ఏమనుకుంటున్నారో, తెల్సుకో కూడదూ…" అనాలి కనుక అన్నట్లు ఉంది యమున గొంతు.
" పొద్దున అమ్మని అడిగా, రానని అన్లేదు కానీ ఎప్పుడొచ్చేది చెప్పలేదు" ప్రభాకర్ నిర్లిప్తంగా!
******
ఆరేళ్ళ క్రితం:
"ప్రభా మన సంసారం పెరుగుతోంది. ఇప్పుడు మీ అమ్మ గారు మనతో ఉండాలంటే మూడో బెడ్రూమ్ కావాల్సి ఉంటుంది" నెలలు నిండిన యమున తన రెండో సంతానం గురించి ఆలోచిస్తూ ప్రభాకర్ తో అంది.
" అక్కడ అమ్మకొచ్చిన కష్టం ఏమీ లేదుగా! ఆలోచిద్దాం" ప్రక్కకి తిరిగి పడుకుంటూ ప్రభాకర్ .
అక్కడ ప్రభాకర్ తల్లి కొడుకు నుండి ఇంకా రమ్మని పిలుపు రానందుకు విచారిస్తోంది.
******
అయిదేళ్ళ క్రితం:
" ప్రభాకర్ ! నాకు ఇదివరకటి ఓపిక ఉండట్లేదురా. ఇంక ఒక్కదాన్నీ ఉండ లేనన్పిస్తోందిరా" అమ్మ ఫోను ప్రభాకర్ కు.
" అమ్మా మూడు బెడ్రూములు ఉండే ఇల్లు వెతుకుతాను. కుదరగానే చెబుతాను" ప్రభాకర్ అమ్మతో.
******
నాలుగేళ్ళ క్రితం:
"యమునా, అమ్మ ఫోన్ చేసి అడిగింది - త్రీ బెడ్ రూమ్ ఇంకా దొరక లేదా - అని"
"పెరిగిన సంసారం, ఖర్చులతో అది కుదిరే పనిలా ఎక్కడుంది. ఉన్నదేమో ఇరుకైపోయింది సామాన్లు పెరిగి" యమున వ్యాఖ్యానం.
******
మూడేళ్ళ క్రితం:
"అమ్మ తన పెన్షన్ ఆఫర్ చేస్తోంది త్రీ బెడ్ రూమ్ ఇంటికి మారడానికి" ప్రభాకర్ .
" ఎంత సిగ్గుచేటు అలా తీసుకోడం మనకి! ఈ సంవత్సరమే పెద్దదాన్ని మంచి స్కూల్లో చేర్చాల్సి కూడా ఉంది. ఆ ఖర్చు లేక పోయినా బావుండేది" పరోక్షంగా అసమ్మతి రాగం యమున గళంలో.
******
రెండేళ్ళ క్రితం:
" అమ్మ తన మోకాలు ఆపరేషన్ ఇక్కడే చేయించు కుంటుందట. తగ్గాక మళ్ళీ వెళ్ళి పోతుందట" అమ్మ మాటని భార్యకి చెప్పాడు.
" అంటే ఒక అయిదారు నెలలు ఉన్నదాన్లోనే సర్దుకోవాలి అందరం" భవిష్యత్తు ముందుంచింది యమున.
******
ఏడాది క్రితం:
" అమ్మ చేసుకోలేక పోతోందిట" ప్రభాకర్ .
" ఎవరైనా అటెండెంట్ ని పెట్టిద్దాం. మూడు బెడ్ రూమ్ ల ఇంటికి పెరిగే అద్దె ఖర్చు అటు పంపిద్దాం" సలహాగా అన్నది యమున.
******
ఆఫీసుకు వెళ్ళబోతూ...
"యమునా …. అమ్మ ఫోను చేసింది. మనం ఒకసారి వస్తే తన దగ్గర ఉన్న సామాన్లలో మనకి కావల్సినవి మనకి ఇచ్చి మిగిలినవి ఏ అనాధ ఆశ్రమానికో ఇచ్చేస్తుందట" ప్రభాకర్ భార్యతో అన్నాడు.
" మనతో ఒక్కమాట కూడా అనకుండా అలా వచ్చేద్దామని నిర్ణయించుకుంటే ఎలా" నిశ్చేష్టురాలై యమున.
"అమ్మ రావడం లేదు. స్వఛ్చందంగా వృధ్దాశ్రమంలో చేరిందట అక్కడే"
Comments
Post a Comment