కిర్ కిర్ తలపులు

కన్య - కుమారి:

అమ్మ చెప్పింది….

మాట్లాడు

మగాళ్ళతో

వాళ్ళ మాటలు

“పక్క”దారి పట్టనంత వరకు

స్నేహ గుణం:

గడియారం కొట్టుకుంటోంది….

గుండేె కొట్టుకుంటోంది.

రెంటికీ ఒకటే స్నేహ గుణం -

చెప్పా పెట్టకుండా....

ఆగి పోవడం

ఆగిన చక్రం:

వాన ముందా?

చెట్టు ముందా?

వానొస్తే చెట్టు పెరుగుతుంది

చెట్టు పెరిగితే వానొస్తుంది

తిరిగే ఈ చక్రం మధ్యలో 

గొడ్డలి ఎక్కడ నుంచొస్తోంది

పోరాటం:

“నిజం” కి ధైర్యం ఎక్కువ

ఎప్పుడూ 

ఒంటరి పోరాటమే

“అబద్దం” పిరికిది

పదిమందిని

వెంటేసుకు తిరుగుతుంది

వేటగాళ్ళు:

మనిషి - ౘఋస్తున్నాడు తొడ

వలలో చిక్కుకున్న మృగాన్ని చూసి

దోమ - చేస్తోంది బల్లే.. బల్లే..

తెరలో దాక్కున్న మనిషిని చూసి

కనబడుట లేదు:

నా కవలలు

సంతోషం - సంతృప్తి

తప్పి పోయాయి

వెతకడం మొదలెట్టాను

కొండల్లో, కోనల్లో,

స్టార్ హోటళ్ళలో, రిసార్టుల్లో,

బజార్లలో, షాపింగ్ మాలుల్లో,

గుళ్ళల్లో, గోపురాల్లో

ప్రకటించాను 

ఉన్నదంతా ఇచ్చేస్తానని

నా కవలల్ని నాకు తెచ్చిమ్మని 

ఓ పెద్దమనిషి చెప్పాడు

చూసానని

నా వెంటే ఉన్నాయట

నా నీడగా ఉన్నాయట

నిజమా!

అందంగా లేనా:

ప్రేమించాను -

పసితనంలో - ఇంట్లో వాళ్ళందర్ని

చిన్నతనంలో - స్నేహితుల్ని

కౌమారంలో  - గురువుల్ని

యవ్వనంలో - సహచరిని

సంసారంలో - సంతానాన్ని

వృత్తిలో - పనిని

వార్ఢక్యంలో - దేవుణ్ణి

నే వచ్చిన పని అయిపోయింది

చివరిగా…...

నన్ను నేను చూసుకోవాలని

అద్దం ముందు నిలుచున్నాను

నా బింబం అడిగింది దీనంగా -

నీకెప్పుడూ అన్పించ లేదెందుకు?

నన్ను ప్రేమించాలని.....

గాలింపు:

విదేశాల్లో సంతానం

నువ్వెగరేసిన గాలిపటం

ఎత్తులో ఎగురుతుంటే

ఘనంగా ఉంటుంది

గిరిటీలు కొడ్తూంటే 

భయంగా ఉంటుంది

దానితో బంధం 

సన్నని దారం

అది తిరిగొచ్చేది 

దారం గట్టిదైనప్పుడే

బంధం బలంగా లేకపోతే

తెగిన పటాన్ని 

తిరిగి తెచ్చుకోగలవా

జిహాదీలు:

మందుగుండు

తలను పెట్టుకు తిరిగే

అగ్గిపుల్ల చేసేదీ

మనసు కడుపులో దాచుకొని

కాపురం చేసే

ఆడపిల్ల చేసేదీ

ఆత్మాహుతి దాడులే

రిటర్న్ గిఫ్ట్ :

రాజకీయాల్లో 

చేరినోడి ఇల్లాలికి

ఏడు వారాల

నగలు

సైన్యంలో

చేరినోడి ఇల్లాలికి

ఏడు రంగుల

తెల్ల చీర

మీకు మీరే మాకు మేమే:

విడి విడిగా నిప్పు రవ్వలు

ఒక్కటైతే అగ్నికీలలు

విడి విడిగా కొమ్మలు

ఒక్కటై మహావృక్షం

విడి విడిగా బిందువులు

కలిసి మహాసంద్రం

విడి విడిగా మనుష్యులు

కలిస్తేగా… మానవత్వం

ఆకలి రాజ్యం:

కడుపు నిండి నోడి

మనససంతా

కళా పోషణ మీదే

కడుపు కాలే వాడిి

మెదడంతా

ఉదర  పోషణ మీదే

ఇద్డర్లో చిన్న తేడా -

నిండి

నిండక

పోవడమే 

గుణం:

పది మందికి

ఉపయోగపడడం

వేడుక

పది మందిని

ఉపయోగించుకోడం

వాడుక

సంబంధీకులు:

పైన

పల్లకిలో ఉన్న వాడికి

కడుపు కాలదు

క్రింద

పల్లకి మోసే వాడికి

కడుపు నిండదు

ఇద్దరిదీ

శారీరక సంబంధం

ఒకళ్ళది 

సుఖ పడ్తుంది

ఇంకోళ్ళది 

కష్ట పడుతుంది

ఇది 

అక్రమసంబంధమా

సక్రమ సంబంధమా

కాలం తేల్చలేదు 

ఇప్పటి వరకు

ఈ బంధం

తెగనంత వరకూ 

తప్పవు -

“పల్లకీ మోతలు”

  

శిధిలం - పదిలం:

జబ్బు చేసి నోడికి

ప్రభుత్వ ఆసుపత్రి

డబ్బు చేసి నోడికి

సూపర్ స్పెషాలిటీ ఆసుపత్రి

మొదటి దాని

గోడలు 

కూలు తున్నయ్ 

రెండో దాని

అంతస్తులు

పెరుగుతున్నయ్ 

ధృతరాష్ట్ర కౌగిలి:

సమస్యలు

మనుష్యుల్ని

కౌగిలించు కుంటాయి

సమస్యలున్న మనుష్యుల్ని

బాబాలు

కౌగిలించు కుంటారు

సమస్యలు

బాబాలు

మోసాలు

కుల మతాలకి

అతీతం

సింహాసనం:

ఉద్యోగం కొత్తల్లో -

పది మంది మధ్యన 

పని చేసే వాడిని

మనసు పంచు కునేందుకు

చుట్టూ మనసున్న మనుష్యులు

పై పదవులు వచ్చాయి - 

చుట్టూ అడ్డగోడలు లేచాయ్

ఒంటరినై పోయాను

చుట్టూ మనసుల్లేవ్ - యంత్రాలే

వస్తూ పోతూ మతలబు మనుష్యలు

ఏమైనట్టు -

వెలి వేశారా?

బలి చేశారా?

నిరీక్షణ:

తెలిసింది

సాంత్వన

ఎక్కడ దొరుకుతుందో  —

ఓ కళలో

ఓ పనిలో

ఓ అలవాటులో

ఓ సహచరి/డు లో

తెలియందేంటంటే

అది

ఎప్పుడు దొరుకుతుందో…

భారీ లోటు:

మానవ వనరుల్ని

ఎగుమతి 

చేస్తున్నాం

పశ్చిమ సంప్రదాయాల్ని

దిగుమతి 

చేసుకుంటున్నాం

ఎగుమతుల

లాభం కంటే

దిగుమతుల

మూల్యం

ఎక్కువౌతోంది

ఏడాదేడాదికి

ఎవరు గొప్ప?:

చిన్నప్పుడు చదివిన పాఠం - 

అవయవాలు 

వంతులు పడితే

మనిషి ప్రాణం పోయింది

ఇప్పుడు నేర్చిన పాఠం -

కులమతాలు 

పోటీ పడితే

మానవత్వం చచ్చింది

అత్యాచారాలు:

రెండు కళ్ళ ఎదుట 

వ్రాసే ఉంది - 

మద్యం సేవించడం ఆరోగ్యానికి హానికరం - 

తాగుడు ఆగలేదు

పొగ త్రాగడం ఆరోగ్యానికి హానికరం - 

ఈ తాగుడూ ఆగలేదు

మూడు కళ్ళూ 

మూసుకు పోయి చేసే పనికి

ఎక్కడ వ్రాసినా ఆరవు -

మానభంగ హోమాలు

పీడనం:

సముద్రం లోంచి వచ్చే

ఉప్పెనలకి ఎన్ని పేర్లో -

కత్రిన

రీన

ఎరిక

సునామీ

లైలా

ఇర్మా

సైమూర్

ఉలికా

వగైరా...వగైరా….

గుండె లోతుల్లోంచి

పొంగే కెరటాలకి

ఒకటే పేరు -

కన్నీళ్ళు

ఓటమి కోసం పోటీ:

గడియారంలో

ముల్లులకు పోటీ - 

సెకనుల ముల్లు

గంటకు అరవై

చుట్లు చుట్టినా

దాని స్థానం

ఎప్పుడూ మూడోదే.

ఓ థెరిసా !:

ఆటల పోటీలు

మొదలు అవుతయ్ 

LOVE   ALL తో !

జీవితపు ఆట

LOVES ALL తో

ముగిస్తే 

ఎంత 

సార్ధకత!

శలభాలు:

ఆకర్షిస్తున్నాయ్ 

విదేశీ కోలువులు

తిరిగి వచ్చేది

పెట్టెల్లో 

సంపదలైతే

హర్షనీయం

పేటికల్లో

శరీరాలైతే

శోచనీయం

కూటి కోసం:

పుట్టిన బిడ్డకు

అలంకారాలు, ఆభరణాలు

పోయిన ప్రాణం కోసం

డప్పులు, నృత్యాలు

జననం నుంచి

మరణం దాకా

పేరేదైనా

అన్నీ ఉపాధి పధకాలే

పురోగామి:

నేర్చుకుంటే -

గడియారం దగ్గరా

విషయం ఉంది

ఎల్ల వేళలా

- ముందుకు సాగడమే

- అలుపొస్తే ఆగడం

మడమ .

తిప్పే

మాటే

లేదు.